Ergens

 



Ergens hinne


‘Ik sil fuort,

wêrhinne

dat wit ik net.’

Hy wie fan betinken
dat de bestimming der net ta docht.

‘Ik sjoch it wol’,

sei er betochtsum,

‘der sit my

neat yn de wei.
Ik ha de romte

oer it paad

fan de totaliteit.’



Te plak
Dan komt er 

ergens oan

dêr ’t er gjinien ken.

De tas oan ‘e kant,

de jas oer de stoel

njonken it opmakke bêd.

In finster mei útsicht

oer in frjemde stêd

en wekkerwurde 

sûnder hinder.

It is net minder

as it útpakken

fan in geskink.



Werom

Al is miskien de mins 

de maat fan alle dingen,

in reis nimt grif

de mins de maat.

Alle stappen 

spoare troch de tiid

nei it ûnbekende.

Sels de weromreis

bringt him fierder

fan hûs as er tinkt,

omdat it gjin lêste

bestimming is.


in nij begjin

(mei kâlde fingers)


Hy hie online - want dat moast - in ôfspraak makke foar in nij paspoart en in ID kaart. Trije dagen lang krige er doe yn’t foar in 'herinnering' yn de mail. Oant sels twa oeren fan te foaren ta.
‘Ik waard der der suver senuwachtich fan,’ sei er tsjin de aardige amtenaresse doe’t er him eksakt op it goede tiidstip by de baly fan de grutte burokratyske katedraal melde.
'Ja', sei se mei in sucht, 'en dan binne der noch minsken dy't net opdaagjen komme.' 

De digitale intelliginsje makke guon blykber net tûker, tocht er. Sels wie er wol bliid dat er fan in protte papieren rompslomp ôf wie.
‘Ha jo twa pasfoto’s meinaam?’ frege se wat strang. Grif in teken dat goed lêze wat er yn in mail stiet ek minder waard.
Twa kear moast er in hanteken sette, twa kear waard it nei in kompjûtersken goedkard. Mei in tefreden knikje fan de jonge frou der by.
Soe se har hier sa ljocht ferve ha, skeat it troch him hinne?
Se sloech de blauwe eagen nei him op,  as woe se sizze: no komt it!
En dat wie ek sa.
‘No moatte we jo fingerprinten noch even skenne. Dat is ferplicht’, sei se.
Hy hie it net lêzen yn de mail, mar hie goed yn de gaten dat er him dêr net foar wei wine koe.
Se skode in lyts apparaatsje nei him ta. De funksje wiisde him fansels. Tocht er.
‘Ho, ho, ho!’, rôp se krekt wat te lûd, ’it lampke moat earst read baarne.’
Skrokken lûk er de hân wer om. 

It mocht noch in kear op nij. Earst de lofter wiisfinger. Dat slagge net. Dan de rjochter mar. Wer mis.

It biometryske proses hapere like bot as de alderearste wifi fan jierren tebek. 
Op de pink en tomme nei kamen alle fingers mear as ien kear oan bar.
‘Sa slim ha ik it noch noait meimakke’, krige er wat noartsk te hearen. Hy fielde him suver skuldich.
‘In krimineel soe grif bliid mei sokke fingers wêze.’ besocht er de gek der wat mei te slaan. Gjin reaksje.

Mei in lichte kleur meande se ferwoast mei de mûs oer it buro. It holp neat.
‘Ik ha krekt in oere swommen’, ûntskuldige er him, de fingers binne tink ik noch kâld en glêd fan it gloarwetter.’
Hy pûste en blaasde ris yn de stive fûsten. Bylden fan in gnyskjende Elon Musk dy’t Bill Gates in high five joech kamen even by him op. Sei dy lêste net dat it takomstige keunstferstân fan apparaten net inkeld lêze en skriuwe kin, mar ek problemen oplost?
‘Watte?’
Oft er even mei de fingers by de noas delstrike woe.
‘Huh?’
‘Dan wurde se wat glysterich.’
‘Oh!’
Syn boargerlike rjocht op de tsien minuten dy’t foar de oanfraach stienen wienen al om. Hy krige ek syn nocht, dat hy poetste de kâlde fingers op de noas hast krekt sa read as it lampke fan it systeem dat him yn de biometryske krochten opslaan moast.
De intelliginte datalêzer fan de mins hie it der noch hieltiten dreech mei, mar syn opdracht waard folbrocht. De beide middelfingers woenen it bêste. Hy stuts ien op, om him ôf te reagearjen. Under de baly, sa fatsoenlik wie er noch wol.
Doe mocht er betelje.
‘Ja wis, kin dat wol digitaal’. Se sei it as wie it de domste fraach fan de dei.
Syn hannen trillen in bytsje. De blauwe tosk fan de telefoan krige gjin byt op it automaatsje. Nei trije kear besykjen en ien binnesmûlsk raar wurd kaam it sinjaal goed oer. Akkoord!

Foar 120 euro koe Big Brother as it sa útkaam syn lyk no makliker identifisearje. Mar at se my yn it wetter fine, dan wurdt it neat, stelde er fêst. 

Mei iiskâlde hannen seach er bûten op de telefoan dat er syn nije identiteit in wike letter ophelje koe. Dat joech him moed. Dan koe er letterlik en figuerlik wer jierren foarút en de wide wrâld yn. 

By it thúskommen siet der al wer in earste melding fan in ‘herinnering’ by de mail.






24


 

23/24

Frede

De tiid tilde
yn dy winter swier oan it jieroersicht
fan de nuvere minskeriten.

Ferwachtingen
fan serene desimberstilte
spielden mei te heech wetter
oer te lege diken fuort.

Foarnimmens fan
ferdraachsumer lûden
fersûpten yn kabaal.

It wie in striid mei de frede
en doe moast it noch
âldjiersjûn wurde. 




Desimber


Wjerlûdich guozzepetear
dûnse oer in flueske snie
en nuet bûgden de beripe
reiden harren fine fearren.

It legelânwetter lei iisklear
yn ’e omkriten fan Smelle Ie,
dat yn in dizige wintersfear
oan ivige frede tinken die.

Ynienen klonk der earne
in tongerjende klap, reagers
spatten as stienslach fuort.

It greidlân kaam yn ’e mist
as in roukleed yn beweging;
ien goes bleau deastil lizzen.


December

Resounding geese talk
danced over a web of snow
where the frosted reed bowed
their fine feathers low.

The water shone as ice
in the misty peatland nearby
and the cold winter sphere
felt like eternal peace.

However, suddenly I heard
a thunderous blow,
shivering herons fled in fear.

The fog in the bog rose
stately like a shroud to the sky;
one goose did not survive.

wille


 De Wille


Ik rûn
doe’t ik it koe
samar oeral wat hinne.

Ik fytste
letter en hyltyd langer
al wat fierder fan hûs.

Ik reizge
oer slingerdiken
en rjochte spoaren,
my lang net fier genôch.

Ik fleach
mei wjokken
boppe de wolken,
dat like der teminsten op.

En ik swom
yn de welle
fan myn wurden,
doe wist ik it seker,
hjir bin ik yn myn elemint!

???












Mystearje

Wat sjochst noch,
as it ljocht dimmet
en de sykjende eagen
omtaaste moatte
yn de skimerwalen 
fan in stilfallende wrâld
om dy hinne.

Wat sjochst noch,
as de kleuren ferinne
en har glâns en gloarje
stadichoan ferlize
om wei te wurden
yn de oanboazjende dize
fan in grauwe floed.

Wat sjochst noch,
ast gjin wurden mear
waarnimme kinst
dy’t de wierheid
ûnder eagen sjen doare
om te beskriuwen
wat se sjogge.

Sjochst dan in planeet
yn in sieltôgjend universum
beskildere mei ljocht
fan ûnbestimde kleuren
dy’t dimmen dôvje
en net mear sear dogge
oan de eagen?

Stoareagest dan ferbline
en tagelyk berêstend
nei de see fan de nacht
yn in kosmyske leechte
dêr’t brutsen weagen
nergens in fêste wâl
mear fine kinne?

net maklik


 It boekemantsje

Hy mocht
graach kleurje,
al wie it wol dreech
om keurich tusken
de lyntsjes te bliuwen.

En doe’t er ek al in
lyts bytsje tekenje koe
wienen de foarmen
alyksa in hiele toer.

Krekt as it skriuwen
mei al dy letters
dy’t min woenen
wat hy woe.

Wat yn’e holle sit
lit him net altiten
maklik stjoere.

Pas letter lieten
de hannen har
better dwinge
mei fingers
dy’t wurden
en bylden
fongen.

Oktober


 

Goudstoarm

Tinkend oan de tún
sjoch ik bekoarlike
kleuren geandewei
troch de tiid feroarjen,

rigen ranke tulpen
en titelroazen
dy’t as herauten
de kop opstutsten

en yn de groeisume
simmer pronken
talrike blommen
ferspraat yn it grien,

mei krûden, klimmers,
boaiembedekkers
en fleurige útrinners
fan ferwyldere túch,

de sinne stipe se
graach, mar giet starich
betider yn dizenige
dampen ûnder,

yn de rin fan oktober
wurdt alles minder,
rimpen smoart de hjerst 
de sterkste tinten.

(frij nei H. Marsman)